Ministrja e Energjisë, Minierave dhe Burimeve Minerale e Maqedonisë së Veriut, Sanja Bozhinovska, zhvilloi sot një takim pune me përfaqësues të Bankës Botërore, ku u diskutuan aktivitetet aktuale dhe planet për përmirësimin e sektorit energjetik në vend, me theks të veçantë në tranzicionin e përshpejtuar energjetik, rritjen e efikasitetit dhe zhvillimin e burimeve të ripërtëritshme të energjisë.
Gjatë takimit u theksua gatishmëria për forcimin e bashkëpunimit në fushat kyçe të transformimit energjetik, përfshirë modernizimin e infrastrukturës dhe përparimin drejt burimeve të pastra të energjisë. Ndër prioritetet e diskutuara ishin investimet në projekte që do të kontribuojnë në stabilitetin afatgjatë dhe sigurinë e furnizimit me energji për vendin.
Përfaqësuesit e Bankës Botërore shprehën mbështetjen e tyre të parezervë për Maqedoninë e Veriut në rrugën drejt një sistemi energjetik më të qëndrueshëm dhe më efikas. Ata prezantuan gjithashtu Programin për Rezultate (Program-for-Results), një instrument i Bankës që synon të mbështesë projekte afatgjata përmes objektivave të matshëm, transparencës dhe vlerësimit të rezultateve. Programi konsiderohet veçanërisht i përshtatshëm për sektorët që kërkojnë reformim institucional, investime të konsiderueshme dhe menaxhim të mirë të burimeve.
Ministria e Energjisë prezantoi disa fusha prioritare për bashkëpunim të mëtejshëm me Bankën Botërore. Këto përfshijnë rritjen e kapaciteteve për prodhimin e energjisë nga burime të ripërtëritshme, digjitalizimin dhe modernizimin e rrjetit energjetik, si dhe zhvillimin e një projekti të ri për rritjen e efiçiencës energjetike në sektorin rezidencial, i cili do të ofrojë përfitime të drejtpërdrejta për qytetarët përmes masave për kursimin e energjisë në shtëpi.
Ministrja Bozhinovska përsëriti përkushtimin e saj për të çuar përpara reformat konkrete, planifikimin strategjik dhe përmirësimin e kuadrit ligjor në përputhje me standardet ndërkombëtare. Ajo falënderoi Bankën Botërore për mbështetjen e vazhdueshme, duke e cilësuar atë si thelbësore për përshpejtimin e tranzicionit të gjelbër dhe ndërtimin e një sistemi energjetik të qëndrueshëm.
Ministria konfirmoi se do të vazhdojë bashkëpunimin aktiv me institucionet financiare ndërkombëtare në zbatimin e projekteve strategjike që mbështesin zhvillimin ekonomik dhe sigurinë energjetike të Maqedonisë së Veriut.
