Dega e grupit Kastrati për energji të ripërtëritshme, Sunny Side Energy, është bërë anëtare e bursës së energjisë Shqipëri-Kosovë, ALPEX. Lajmin e bëri të ditur vetë ALPEX përmes një postimi në LinkedIn më 10 shtator 2025.
Ky anëtarësim i mundëson Sunny Side Energy të tregtojë energji elektrike në tregun ditor dhe intraditor të zonës shqiptare të bursës. Sipas grupit Kastrati, ky është një hap strategjik për zgjerimin e aktivitetit në sektorin e energjisë dhe investimet në projekte të energjisë së ripërtëritshme.
Në tetor të vitit të kaluar, qeveria shqiptare miratoi kërkesën e Sunny Side Energy për ndërtimin e një impianti fotovoltaik me kapacitet prej 100 MW në afërsi të Fierit.
Grupi Kastrati, një nga grupet më të mëdha ekonomike në Shqipëri, operon në sektorë të ndryshëm si energjia, ndërtimi, tregtia, turizmi dhe transporti.
Anëtarësimi në ALPEX është një shenjë e angazhimit të grupit për të zhvilluar tregun e energjisë në rajon dhe për të harmonizuar standardet me Bashkimin Evropian.
