Pavarësisht kuadrit ligjor dhe ambicieve kombëtare, programi grek për zhvillimin e energjisë së erës në det të hapur është në ngërç tashmë për më shumë se një vit, duke ngritur dyshime mbi aftësinë e vendit për të arritur objektivin prej 1.9 GW deri në vitin 2030.
Sipas Planit Kombëtar të Energjisë dhe Klimës (NECP), Greqia kishte planifikuar që deri në vitin 2030 të kishte në funksion të paktën 1.9 GW kapacitet nga energjia e erës në det të hapur. Megjithatë, përkundër këtij objektivi, progresi ka ngecur, ndërkohë që Programi Kombëtar për Energjinë e Erës në Det të Hapur, dokumenti kyç që duhet të miratohet me vendim ministror, është gati prej më shumë se një viti dhe ende pret nënshkrimin zyrtar.
Ndër kompanitë e përzgjedhura në fazat e para për eksplorimin e zonave detare janë Public Power Corporation (PPC), Terna Energy dhe Motor Oil Hellas, të cilat kanë marrë leje për një zonë pranë Alexandroupolis, në veriperëndim të vendit. Projekti pilot parashikon një kapacitet prej 600 MW dhe, nëse realizohet sipas planit, pritet të vihet në funksion deri në vitin 2029.
Megjithatë, sfidat kryesore mbeten të hapura. Ministria e Mjedisit dhe Energjetikës nuk ka kërkuar ende miratimin nga Komisioni Evropian për mekanizmin mbështetës financiar përmes kontratave për diferencë (Contracts for Difference – CfD), i konsideruar si element thelbësor për sigurimin e investimeve të qëndrueshme në këtë sektor.
Analistët paralajmërojnë se nëse projekti nuk përshpejtohet, Greqia rrezikon të mos arrijë objektivat e saj për zhvillimin e energjisë së erës në det të hapur, duke kompromentuar përpjekjet për të balancuar sistemin energjetik dhe për të reduktuar kufizimet që vijnë nga dominimi i prodhimit fotovoltaik.
Pezullimi i zgjatur ka dërguar sinjale të qarta te investitorët se ritmi i zhvillimit të këtij sektori mbetet i ngadaltë dhe i paqartë në fazat vendimtare të zbatimit. Përveç vonesave burokratike, mungesa e mekanizmave të qartë mbështetës dhe pritja e gjatë për miratimin institucional po zbehin interesin për investime afatmesme dhe afatgjata në këtë segment të rëndësishëm të tranzicionit energjetik grek.
