Prodhuesi shtetëror i rrymës rrit çmimin për furnizuesin universal: A do të ndikojë kjo në rritjen e çmimit të energjisë për konsumatorët në Maqedoninë e Veriut?
Çmimi i rrymës për furnizuesin universal nga kompania shtetërore prodhuese Elektranat e Maqedonisë së Veriut (ESM) do të rritet me 4,84% vitin e ardhshëm.
EVN Home, si furnizuesi universal i energjisë elektrike në Maqedoninë e Veriut, në tenderin për prokurimin e energjisë elektrike për plotësimin e nevojave të konsumatorëve për periudhën janar-dhjetor 2026, ka pranuar vetëm një ofertë, atë nga ESM, me çmimin e shitblerjes së energjisë elektrike prej 65 euro për megavat-orë. Ky çmim do të mbulojë 100% të sasisë së përgjithshme të planifikuar.
“Ky çmim është 4,84% më i lartë se çmimi i mëparshëm, i cili u pranua në tenderin e fundit të furnizuesit universal (qershor-dhjetor 2025), ku ESM ofroi çmim të shitblerjes prej 62 euro për megavat-orë,” thanë nga EVN.
Nga EVN shtuan se, nën monitorimin e plotë të Komisionit Rregullator për Energjetikë dhe në përputhje me obligimet ligjore dhe metodologjinë e përcaktuar më parë, në periudhën në vijim EVN Home do të llogarisë çmimin e energjisë elektrike sipas parametrave hyrës të paracaktuar.
Në çmimin përfundimtar përfshihen: çmimi me të cilin ESM ia shet energjinë elektrike EVN Home-it, çmimi i Sistemit Operator të Përçuesve MEPSO, çmimi i Operatorit të Tregut të Energjisë Elektrike MEMO, si dhe çmimi i Sistemit Operator Distributiv – Elektrodistribuimi.
