Rumania po shënon një zhvillim interesant në sektorin e energjisë: kapaciteti i baterive të instaluara nga prosumatorët – familje dhe biznese që prodhojnë energjinë e tyre – tashmë tejkalon kapacitetin e sistemeve të ruajtjes së energjisë që zotërojnë kompanitë energjetike tradicionale.
Sipas të dhënave të publikuara nga Shoqata e Prosumatorëve dhe Komuniteteve të Energjisë në Rumani (APCE), prosumatorët kanë instaluar mbi 800 MW kapacitet baterish, ndërsa kompanitë energjetike kanë rreth 600 MW sisteme të ruajtjes së energjisë.
Rritja e shpejtë e këtij segmenti lidhet me zgjerimin e prodhimit të energjisë diellore në nivel familjar dhe të bizneseve të vogla. Aktualisht, në Rumani janë rreth 66,000 prosumatorë që përdorin bateri, të cilat u mundësojnë të ruajnë energjinë e prodhuar gjatë ditës dhe ta përdorin atë kur kërkesa për energji është më e lartë, njofton Balkan Green Energy News.
Megjithatë, ekspertët e sektorit vlerësojnë se shifrat reale mund të jenë edhe më të mëdha. Jo të gjithë prosumatorët raportojnë instalimin e baterive tek operatorët e rrjetit, çka nënkupton se kapaciteti total i ruajtjes së energjisë në këtë segment mund të jetë edhe më i lartë se vlerësimet aktuale.
Sipas përfaqësuesve të APCE, prosumatorët po shndërrohen gradualisht në një infrastrukturë energjetike të shpërndarë, e cila mund të ketë rol të rëndësishëm në balancimin e sistemit energjetik dhe në stabilizimin e rrjetit.
Rritja e numrit të prosumatorëve në Rumani ka qenë e shpejtë gjatë viteve të fundit. Në fund të vitit 2025, vendi kishte rreth 290,000 prosumatorë me mbi 3.3 GW kapacitet të instaluar fotovoltaik, duke e bërë këtë segment një nga shtyllat kryesore të tranzicionit energjetik të vendit, përcjell Energy Monitor.
Në këtë kontekst, bateritë po bëhen gjithnjë e më të rëndësishme për sistemin energjetik, pasi ndihmojnë në menaxhimin e prodhimit të lartë nga energjia diellore dhe në përmirësimin e fleksibilitetit të rrjetit.
