Kompania shtetërore energjetike e Malit të Zi, Elektroprivreda Crne Gore (EPCG), nuk ka marrë asnjë ofertë në tenderin e saj të dytë për instalimin e një sistemi për ruajtjen e energjisë me bateri (BESS).
Tenderi, i shpallur në dhjetor, parashikonte instalimin e një sistemi baterish me fuqi 100–130 kW dhe kapacitet 200–260 kWh, si pjesë e një projekti pilot. Vlera e prokurimit ishte rreth 75,000 euro, por deri në afatin përfundimtar nuk u dorëzua asnjë ofertë, raporton Balkan Green Energy News.
Kjo është përpjekja e dytë e pasuksesshme e EPCG-së për të realizuar një projekt të tillë. Tenderi i parë, shumë më i madh, parashikonte instalimin e dy sistemeve të ruajtjes së energjisë me bateri, me kapacitet total 60 MW dhe 240 MWh, por u anulua më herët për shkak të mungesës së financimit, transmeton Energy Monitor.
Sipas kompanisë, nevoja për sisteme të ruajtjes së energjisë është rritur për shkak të shtimit të shpejtë të vet-konsumatorëve me panele diellore në rrjetin e shpërndarjes në vitet e fundit, përmes programeve Solari 3000+, 500+ dhe 5000+.
Sistemet e ruajtjes së energjisë me bateri konsiderohen një teknologji kyçe për stabilizimin e sistemit energjetik, pasi mundësojnë ruajtjen e energjisë së tepërt nga burimet e ripërtëritshme dhe përdorimin e saj në periudha me kërkesë më të lartë.
