Presidenti francez Emmanuel Macron deklaroi se Franca ka kapacitetin të hapë qendra të mëdha të dhënash dhe të përmbushë nevojat në rritje të inteligjencës artificiale falë eksporteve të saj të konsiderueshme të energjisë elektrike.
Gjatë fjalimit të tij në Samitin Botëror të Energjisë Bërthamore në Boulogne-Billancourt, pranë Parisit, Macron theksoi se vetëm vitin e kaluar Franca eksportoi rreth 90 teravat-orë energji elektrike të dekarbonizuar. Sipas tij, kjo është e mundur falë kapaciteteve të mëdha të prodhimit nga centralet bërthamore.
Ai u shpreh se ky potencial energjetik i jep Francës mundësinë të ndërtojë më shumë qendra të përpunimit të të dhënave dhe kapacitete të fuqishme kompjuterike, duke e vendosur vendin në qendër të zhvillimit global të inteligjencës artificiale.
Macron theksoi gjithashtu se Bashkimi Evropian duhet të zhvillojë konceptin e “lëvizjes së lirë të elektroneve të dekarbonizuara”, duke krijuar një treg të integruar energjetik ku vendet anëtare kontribuojnë me burimet e tyre të energjisë. Sipas tij, një qasje e tillë do të ndihmonte në rritjen e konkurrueshmërisë, përballimin e ndryshimeve klimatike dhe forcimin e sovranitetit energjetik të Evropës.
Presidenti francez u bëri thirrje gjithashtu vendeve evropiane të rrisin konkurrueshmërinë në zhvillimin e reaktorëve të vegjël modularë bërthamorë, të njohur si SMR. Ai theksoi se aktualisht Shtetet e Bashkuara, Kanadaja dhe Kina janë në krye të këtij tregu.
Ndërkohë, në muajin shkurt, ministri francez i Financave Roland Lescure bëri të ditur se Franca synon të rrisë prodhimin e energjisë elektrike nga burimet bërthamore dhe ato të rinovueshme me rreth 20 për qind gjatë dekadës së ardhshme. Sipas tij, qeveria pritet të publikojë së shpejti një plan të ri për elektrifikimin, që synon të përshpejtojë largimin nga përdorimi i karburanteve fosile.
