Banka Evropiane për Rindërtim dhe Zhvillim po shqyrton dhënien e një kredie deri në 70 milionë euro për kompaninë sllovene NGEN, për zhvillimin e një rrjeti të madh baterish për magazinimin e energjisë në disa vende të Evropës.
Projekti përfshin ndërtimin dhe operimin e pesë sistemeve të pavarura të magazinimit me bateri (BESS) në Slloveni, Poloni, Letoni dhe Rumani, me një kapacitet total prej rreth 302 MW dhe 635 MWh.
Ky konsiderohet si një nga projektet e para shumë-shtetërore të këtij lloji në rajon, duke synuar të rrisë sigurinë energjetike dhe të stabilizojë rrjetin elektrik, sidomos në kushtet e rritjes së prodhimit nga burimet e ripërtëritshme, përcjell Energy Monitor.
Sipas detajeve të projektit, fondet do të përdoren për kostot kapitale, zhvillimore dhe operative, ndërsa iniciativa pritet të mbështetet edhe nga garanci në kuadër të programit InvestEU.
Qëllimi kryesor i këtij investimi është të ofrojë fleksibilitet në sistemet energjetike, duke mundësuar balancimin në kohë reale të rrjetit dhe integrimin më të madh të energjisë nga burime si era dhe dielli.
Në të njëjtën kohë, projekti pritet të reduktojë nevojën për përdorimin e kapaciteteve fosile në balancimin e sistemit dhe të përmirësojë qëndrueshmërinë e rrjetit në disa tregje evropiane.
Investimi total i projektit vlerësohet rreth 163 milionë euro, ndërsa përfshirja e EBRD-së shihet si kyçe për sigurimin e financimit në një sektor që ende konsiderohet me rrezik më të lartë për investitorët tradicionalë.
