Kryetari i Lidhjes Demokratike të Kosovës, Lumir Abdixhiku, ka ngritur shqetësime serioze lidhur me funksionimin e njehsorëve elektrikë në vend, duke paralajmëruar për një problem të mundshëm sistemik në matjen e energjisë elektrike.
Në një reagim publik, Abdixhiku tha se të gjeturat e prezantuara nga Departamenti për Energji i LDK-së, përmes anëtarit Visar Azemi, janë alarmante dhe tregojnë se qytetarët mund të jenë duke paguar më shumë sesa konsumojnë realisht.
Sipas tij, nga verifikimi i 884 njehsorëve të realizuar nga aktivistët e kësaj partie, rreth 87 për qind kanë rezultuar të llogarisin kohën në mënyrë të gabuar, duke faturuar energjinë me tarifë të lartë edhe gjatë orëve të natës, kur zakonisht aplikohet tarifa më e ulët.
“Qytetarët po paguajnë më shtrenjtë jo sepse konsumojnë më shumë, por sepse sistemi i matjes po keqllogaritë. Kjo nuk është më rastësi, është dështim sistemik”, ka deklaruar Abdixhiku.
Ai u ka bërë thirrje qytetarëve që të kontrollojnë njehsorët e tyre, ndërsa ka theksuar se LDK do ta ndjekë këtë çështje në të gjitha nivelet institucionale deri në vendosjen e drejtësisë.
Në të njëjtën kohë, kjo parti ka kërkuar hetim të menjëhershëm, përgjegjësi institucionale dhe kompensim për qytetarët e dëmtuar, si dhe ndaljen e çdo rritjeje të tarifave të energjisë deri në sqarimin e plotë të situatës.
Deklaratat e Abdixhikut vijnë në një kohë kur debati për çmimin dhe menaxhimin e energjisë elektrike në Kosovë është intensifikuar, duke shtuar presionin ndaj institucioneve për transparencë dhe mbrojtje të konsumatorëve.
