Ministri francez Lescure tha se takimi do të zhvillohet të hënën dhe do të përqendrohet në vlerësimin e zhvillimeve në rajon dhe ndikimet e tyre të mundshme ekonomike dhe energjetike.
Franca do të thërrasë një takim të përbashkët të ministrave të financave të G7, ministrave të energjisë dhe zyrtarëve të bankave qendrore javën e ardhshme për të diskutuar mbi situatën në Lindjen e Mesme, tha sot ministri i Ekonomisë, Roland Lescure, transmeton Anadolu.
Duke folur për radion RTL, Lescure tha se takimi do të zhvillohet të hënën dhe do të përqendrohet në vlerësimin e zhvillimeve në rajon dhe ndikimet e tyre të mundshme ekonomike dhe energjetike.
“Pra, do t’i shohim ministrat e ekonomisë, ministrat e energjisë dhe bankat qendrore së bashku të hënën për të diskutuar mbi situatën, për të kuptuar se çfarë po ndodh”, tha ai.
Takimi vjen mes tensioneve të larta në Lindjen e Mesme që kanë ngritur shqetësime mbi tregjet globale të energjisë dhe stabilitetin ekonomik.
Franca, e cila ka mbajtur presidencën e radhës të Grupit G7 që nga janari, po koordinon iniciativën si pjesë e përpjekjeve të saj më të gjera për të adresuar sfidat ekonomike globale.
G7 bashkon shtatë ekonomi të mëdha të përparuara, Gjermaninë, Kanadanë, SHBA-në, Francën, Italinë, Japoninë dhe Britaninë. Franca gjithashtu do të presë një samit të G7 në qytetin lindor Evian në mesin e qershorit.
Përshkallëzimi rajonal në Lindjen e Mesme ka vazhduar që kur SHBA-ja dhe Izraeli nisën ofensivë të përbashkët kundër Iranit më 28 shkurt, duke vrarë deri më tani më shumë se 1.340 njerëz, përfshirë ish-liderin suprem, Ali Khamenei.
Irani është kundërpërgjigjur me sulme të përsëritura me dronë dhe raketa që kanë shënjestruar Izraelin dhe vendet e Gjirit që strehojnë asete ushtarake amerikane.
Ngushtica e Hormuzit është bllokuar që nga fillimi i marsit. Rreth 20 milionë fuçi naftë kalojnë normalisht nëpër të çdo ditë dhe mbyllja e saj ka rritur kostot e transportit dhe çmimet globale të naftës.
/aa.com.tr
