Deputetja e Lidhjes Demokratike të Kosovës (LDK), Hykmete Bajrami, ka kritikuar ashpër Zyrën e Rregullatorit për Energji (ZRRE), pas një thirrjeje që kjo e fundit e ka bërë ndaj bizneseve për të lidhur kontrata me operatorë privatë të furnizimit me energji.
Në një reagim të publikuar, Bajrami e ka cilësuar thirrjen e ZRRE-së si “skandaloze” dhe të papërgjegjshme, sidomos në kushtet aktuale kur sipas saj, vetë Korporata Energjetike e Kosovës (KEK) nuk ka arritur ende të faturojë bizneset për muajin qershor.
“Si mund t’u bëni thirrje bizneseve të lidhin kontrata me operatorë privatë, kur KEK-u nuk i ka dërguar ende faturat për muajin qershor? A keni ju ndonjë përgjegjësi për këtë?” – ka pyetur ajo publikisht ZRRE-në.
Sipas Bajramit, pas daljes së bizneseve në tregun e lirë më 1 qershor, importi i energjisë është rritur tetëfish dhe kjo po krijon pasiguri të madhe në sektorin privat, i cili nuk e di ende se sa do të jenë faturat e muajve të kaluar – një pasiguri që mund të ndikojë drejtpërdrejt në vazhdimin e operimit të tyre.
Afati 60-ditor për furnizimin nga KEK po përfundon – kompanitë në tregun e lirë duhet të gjejnë furnizues të ri
“Ju po injoroni realitetin e bizneseve dhe bëni thirrje absurde pa asnjë fije përgjegjësie. Çka do të ndodhë më 1 gusht me ato biznese që nuk kanë arritur të lidhin kontratë? Do t’i lini pa rrymë, do t’i mbyllni, apo do t’i nxirrni mbi 100 mijë punëtorë në rrugë?” – ka shtuar ajo me tone të ashpra.
Deputetja ka hedhur dyshime edhe mbi pretendimet e ZRRE-së se gjykatat i kanë dhënë të drejtë në vendimmarrjet e saj, duke përmendur se në realitet, “dhjetëra vendime të Gjykatës Komerciale janë në favor të bizneseve, jo të ZRRE-së.”
Ajo ka përmbyllur reagimin duke i bërë thirrje Prokurorisë që të nisë hetime për tërë “zinxhirin vendimmarrës në sektorin e energjisë”, duke akuzuar për lidhje të mundshme të operatorëve privatë me pushtetin dhe përfitime në kurriz të shtetit.
Ky reagim i Hykmete Bajramit vjen në një kohë kur pasiguritë në sektorin e energjisë po thellohen dhe një pjesë e bizneseve ndihen të braktisura në procesin e kalimit në tregun e lirë të energjisë. Kërkesat për përgjegjësi institucionale dhe transparencë po rriten, ndërsa tensioni mes sektorit privat dhe autoriteteve vazhdon të thellohet.
KEK paralajmëron: Furnizimi me energji elektrike nga ne për kompanitë në treg të lirë përfundon me 30 korrik, mbeteni pa furnizim me rrymë
Afati 60-ditor për furnizimin nga KEK po përfundon – kompanitë në tregun e lirë duhet të gjejnë furnizues të ri
