Kompania Gasunie ka përfunduar saldimin e pjesës së fundit të tubacionit të parë të hidrogjenit me gjatësi 32 kilometra në zonën e Roterdamit, duke shënuar një moment kyç për zhvillimin e rrjetit kombëtar të transportit të hidrogjenit në Holandë.
Ky tubacion përbën bazën e infrastrukturës për rrjetin e ardhshëm kombëtar, i cili pritet të lidhet me zonat e mëdha industriale në vend dhe të mundësojë përdorimin në shkallë të gjerë të hidrogjenit si burim energjie i pastër.
Tubacioni lidh zonën Maasvlakte 2, ku kompania Shell po zhvillon projektin Holland Hydrogen I, me zonën e Pernisit, ku ndodhet kompleksi industrial Shell Energy and Chemicals Park. Shell pritet të jetë edhe përdoruesi i parë i këtij rrjeti.
Sipas Gasunie, tubacioni do të ketë një rol thelbësor për të konsoliduar Roterdamin si nyje kryesore energjetike në Evropë, duke mundësuar lidhje të ardhshme të furnizimit me hidrogjen drejt Gjermanisë, Belgjikës dhe zonave të tjera industriale brenda Holandës.
Linja do të jetë plotësisht funksionale deri në verën e vitit 2025, duke kontribuar ndjeshëm në objektivat e tranzicionit energjetik të Holandës dhe Evropës, kanë thënë nga Gasunie.
