Mali i Zi ka vënë në operim provë një sistem të ri për reduktimin e emetimeve të oksideve të azotit (DeNOx) në Termocentralin e Pljevljës, termocentrali i vetëm me qymyr në vend. Ky sistem është pjesë e investimeve për modernizimin mjedisor të centralit dhe synon uljen e ndotjes së ajrit.
Sipas rezultateve fillestare nga faza e testimit, sistemi DeNOx po funksionon me efikasitet të lartë. Matjet paraprake tregojnë se emetimet e oksideve të azotit janë ulur në rreth 130 mg për metër kub, krahasuar me rreth 470 mg për metër kub sa ishin më parë. Këto rezultate përfaqësojnë një përmirësim të ndjeshëm dhe janë në përputhje me objektivat e projektit, raporton Energy Monitor.
Termocentrali i Pljevljës ka qenë për vite me radhë në qendër të kritikave për shkak të ndotjes së ajrit dhe ndikimit negativ në shëndetin publik. Vendosja e këtij sistemi konsiderohet një hap i rëndësishëm drejt përmbushjes së standardeve mjedisore, ndonëse prodhimi i energjisë nga qymyri vazhdon të mbetet një sfidë strukturore.
Autoritetet energjetike në Mal të Zi synojnë që përmes këtyre ndërhyrjeve teknike të zgjasin jetën operative të termocentralit, duke reduktuar njëkohësisht ndikimin mjedisor, në një periudhë kur vendi po përballet me nevojën për tranzicion gradual drejt burimeve më të pastra të energjisë.
/Energy Monitor
