Një studim i organizatës energjetike “Ember” tregoi se varësia e vendeve të Bashkimit Evropian nga gazi për prodhimin e energjisë elektrike ka çuar në rritje të çmimit të energjisë.
Sipas raportit, konflikti në Lindjen e Mesme ka bërë që çmimet e gazit të rriten sërish në tregjet botërore.
Kjo ka pasoja të mëdha ekonomike për rajonet evropiane që varen shumë nga importet e gazit për prodhimin e energjisë.
Rritje e madhe e kostove
Çmimet e gazit në Evropë janë rritur me rreth 50%, duke sjellë kosto shtesë prej 2,5 miliardë euro për importet e karburanteve fosile vetëm në 10 ditët e para të luftës.
Çmimet e energjisë janë rritur më shumë në Gjermani, Holandë, Itali dhe Belgjikë, ku përdoret shumë gazi për prodhimin e energjisë.
Ndërsa vende si Spanja, Portugalia, Franca dhe vendet nordike janë prekur më pak, pasi varen më pak nga gazi.
Debat për taksimin e ndotjes
Rritja e çmimeve të karburanteve fosile ka nxitur diskutime për skemën evropiane të çmimit të karbonit.
Kjo skemë detyron kompanitë, përfshirë ato të energjisë, të paguajnë për ndotjen që shkaktojnë.
Italia, e cila varet shumë nga gazi për energjinë elektrike, ka kërkuar pezullimin e përkohshëm të kësaj skeme dhe reformimin e saj në një samit të ardhshëm të BE-së.
Çfarë thotë studimi?
Autorët argumentojnë se kjo skemë në fakt ndihmon në uljen e varësisë nga karburantet fosile, dhe se kostoja e lejeve për ndotjen përbën vetëm një pjesë të vogël të çmimit final të energjisë elektrike.
Në përfundim, studimi paralajmëron se pa investime më të mëdha në burime alternative energjie, faturat e energjisë në Evropë mund të vazhdojnë të rriten sa herë ka kriza ndërkombëtare.
