Shtetet e Bashkuara të Amerikës kanë vendosur të zgjasin deri më 17 prill përjashtimin nga sanksionet për kompaninë energjetike serbe Naftna Industrija Srbije (NIS), duke i dhënë më shumë kohë për të siguruar furnizimin me naftë dhe për të shmangur ndërprerjet në treg.
Në të njëjtën kohë, Jadranski naftovod (JANAF) ka marrë miratimin nga SHBA për të vazhduar furnizimin me naftë bruto për NIS deri në të njëjtën datë. Ky vendim mundëson vazhdimin e rrjedhës së naftës përmes infrastrukturës kroate drejt Serbisë, njofton Energy Monitor.
Serbia mbetet shumë e varur nga importet e naftës, ndërsa Kroacia luan një rol kyç përmes sistemit të saj të transportit të naftës, i cili shërben si një nga rrugët kryesore të furnizimit për tregun serb.
Zgjatja e përjashtimit nga sanksionet konsiderohet një masë e përkohshme për të garantuar stabilitetin e furnizimit me energji, në një kohë kur tensionet gjeopolitike dhe kufizimet në tregjet ndërkombëtare vazhdojnë të ndikojnë sektorin e naftës në rajon, përcjell Energy Monitor.
Megjithatë, pas 17 prillit, e ardhmja e furnizimit mbetet e pasigurt, duke rritur presionin mbi autoritetet dhe kompanitë për të gjetur zgjidhje afatgjata dhe për të diversifikuar burimet e energjisë.
