Një hap tjetër drejt modernizimit të rrjetit energjetik në Kosovë është bërë nga KEDS, me instalimin e sistemit të avancuar SCADA në zonat e largëta malore të vendit.
Trafostacioni në Dajkovc të Kamenicës është përfshirë në rrjetin e monitorimit dhe menaxhimit në kohë reale, duke e lidhur atë drejtpërdrejt me qendrën e kontrollit të kompanisë në Prishtinë.
Përmes këtij sistemi, trafostacionet mund të menaxhohen nga distanca, çka përmirëson ndjeshëm shpejtësinë dhe efikasitetin e ndërhyrjeve në rrjetin elektrik. Kjo përkthehet në një furnizim më të qëndrueshëm dhe të besueshëm me energji elektrike për banorët dhe bizneset në rajon.
“Me zgjerimin e SCADA-s në zonat e thella, po rrisim ndjeshëm kapacitetin tonë për të menaxhuar sfidat e rrjetit në kohë reale dhe për të siguruar shërbim të pandërprerë për konsumatorët tanë,” deklaroi Drenusha Gashi, udhëheqëse e sektorit SCADA në KEDS.
Ky zhvillim është pjesë e një strategjie afatgjate për digjitalizimin dhe përmirësimin e infrastrukturës energjetike në të gjithë Kosovën.
