Sekretari i Përgjithshëm i Kombeve të Bashkuara, António Guterres, ka bërë thirrje që qendrat e të dhënave dhe rrjetet digjitale në mbarë botën të kalojnë sa më parë në përdorimin e energjisë së ripërtëritshme.
Guterres ka theksuar se teknologjia dhe inteligjenca artificiale, ndonëse janë faktorë kyç për zhvillimin global, po kontribuojnë në mënyrë të konsiderueshme në rritjen e konsumit të energjisë dhe emetimin e gazrave serrë.
Sipas të dhënave të OKB-së, qendrat e të dhënave dhe rrjetet digjitale konsumojnë rreth 2% deri në 3% të energjisë elektrike globale, por kjo shifër është në rritje të shpejtë për shkak të zhvillimeve të fundit në fushën e inteligjencës artificiale. Guterres kërkoi që kompanitë teknologjike të përshpejtojnë kalimin në energji të ripërtëritshme dhe të jenë më transparente lidhur me ndikimin klimatik të operacioneve të tyre.
“Është e papranueshme që teknologjitë që pretendojnë të jenë ‘zgjidhje të së ardhmes’ të mbështeten ende në praktika që dëmtojnë klimën. Kërkojmë angazhim të qartë për drejtësi klimatike dhe kalim të shpejtë drejt burimeve të pastra të energjisë”, u shpreh Guterres.
Ai gjithashtu nënvizoi nevojën për rregullore më të forta dhe më shumë mbikëqyrje ndërkombëtare ndaj industrisë digjitale, në mënyrë që rritja teknologjike të mos ndodhë në kurriz të qëndrueshmërisë mjedisore.
