Qeveria e Serbisë ka kërkuar një shtyrje prej 180 ditësh për zbatimin e sanksioneve të Shteteve të Bashkuara ndaj Naftna Industrija Srbije (NIS), kompanisë së vetme prodhuese të naftës në vend, e cila kontrollohet nga Gazprom Neft dhe Gazprom. Sanksionet pritet të hyjnë në fuqi më 29 korrik 2025.
Ministrja e Energjisë, Dubravka Djedoviq Handanoviq, ka theksuar se zbatimi i këtyre sanksioneve do të rrezikonte seriozisht sigurinë energjetike dhe stabilitetin ekonomik të Serbisë, pasi NIS operon rafinerinë e vetme të naftës në Pancevë me një kapacitet vjetor prej 4.8 milionë tonësh.
Ajo ka shtuar se shtyrja e sanksioneve është e domosdoshme për të siguruar furnizim të qëndrueshëm me naftë për rafinerinë, raporton Energy Monitor.
Që nga janari i vitit 2025, kur SHBA-ja vendosi sanksione ndaj sektorit të naftës së Rusisë, NIS ka marrë katër shtyrje, me të fundit që skadon më 29 korrik. Ministrja shpreson se qeveria hungareze do ta mbështesë edhe këtë kërkesë për shtyrje, siç ka bërë edhe më parë.
Nëse sanksionet hyjnë në fuqi, ato do të pengonin zbatimin e kontratës së NIS-it me operatorin kroat të tubacionit JANAF për transportin e 10 milionë tonëve naftë bruto nga 1 janari 2024 deri më 31 dhjetor 2026.
Kjo kërkesë për shtyrje vjen në një kohë të tensioneve në rritje midis SHBA-së dhe Rusisë, duke e bërë sigurinë energjetike të Serbisë dhe rajonit një çështje kyçe dhe të ndjeshme.
/Energy Monitor
