Kompania globale GE Vernova njoftoi se ka arritur marrëveshje për furnizimin, instalimin dhe aktivizimin e 12 turbinave të erës me kapacitet 6.1 megavat secila dhe diametër rotor prej 158 metrash për projektin e erës Zatriq I & II në Kosovë.
Ky projekt realizohet në bashkëpunim me Çalık Renewables dhe përforcon prezencën e GE Vernova në rajon, duke e çuar në 48 numrin e turbinave të tyre që do të operojnë në vend.
Procesi i furnizimit pritet të fillojë në fund të vitit 2025 dhe të përfundojë në fillim të vitit 2026, ndërkohë që impianti planifikohet të jetë plotësisht operativ gjatë gjysmës së dytë të po atij viti. Kur të hyjë në funksion, impianti do të furnizojë me energji të pastër rreth 32,000 familje në Kosovë, shkruan Energy Monitor.
Drejtori Komercial për Tregjet Ndërkombëtare të GE Vernova theksoi rëndësinë e zgjerimit të operacioneve në Ballkan dhe bashkëpunimin e ngushtë me partnerët lokalë për promovimin e energjisë së erës në Kosovë. Ndërsa drejtori i Çalık Renewables e përshkroi këtë projekt si një hap strategjik drejt rritjes së kapaciteteve të energjisë së ripërtëritshme në tregun evropian.
Ky projekt është pjesë e përpjekjeve të Kosovës për të rritur përdorimin e burimeve të ripërtëritshme të energjisë dhe për të përmirësuar sigurinë energjetike duke ulur varësinë nga karburantet fosile.
Projekti i impiantit të erës në Zatriq
Zona e Zatriqit ndodhet në jugperëndim të Kosovës, pranë qytetit të Rahovecit, në një zonë malore me lartësi mbi 800 metra mbi nivelin e detit. Ky vend është identifikuar prej kohësh si një zonë me potencial të lartë për prodhimin e energjisë nga era, falë kushteve të favorshme të erës.
Studiuesit kanë filluar matjet e erës në këtë zonë që nga viti 2009 dhe më vonë kanë vendosur një stacion matës 60 metra të lartë në vitin 2012. Me kalimin e kohës, projekti ka marrë të gjitha lejet e nevojshme mjedisore dhe licencat për të filluar zhvillimin, përfshirë edhe lidhjen me rrjetin energjetik të Kosovës.
Kapaciteti i planifikuar i këtij impianti është rreth 45 megavat, me instalimin e deri në 15 turbina moderne me kapacitet mesatar prej 3 megavatësh secila. Parashikohet që ky park i erës të prodhojë rreth 115,000 megavat-ora energji elektrike në vit, duke kontribuar ndjeshëm në reduktimin e emetimeve të karbonit dhe në furnizimin e rrjetit me energji të qëndrueshme, raporton Energy Monitor.
Projekti i Zatriqit është një nga iniciativat më të rëndësishme të Kosovës në fushën e energjisë së ripërtëritshme dhe përfaqëson një hap të rëndësishëm drejt diversifikimit të burimeve energjetike dhe mbështetjes së qëndrueshmërisë energjetike të vendit.
/Energy Monitor
