Austria ka shënuar një rritje të ndjeshme të regjistrimeve të veturave të reja gjatë muajit korrik 2025, duke arritur në 24,867 njësi, që përbën një rritje prej 31.6% krahasuar me të njëjtin muaj të vitit të kaluar.
Sipas të dhënave të Statistikave të Austrisë, rritja më e madhe është shënuar tek veturat elektrike, me 4,920 regjistrime të reja, një ngjitje prej 67.7%. Edhe veturat me sistem hibrid-benzinë kanë shënuar rritje të fortë prej 62.7% duke arritur në 8,715 njësi, ndërsa hibrid-dizelët u rritën me 17.9%. Modelet tradicionale me benzinë dhe dizel patën rritje më të lehtë, përkatësisht 5.3% dhe 2.3%.
Gjatë periudhës janar–korrik 2025, në Austri janë regjistruar gjithsej 167,918 vetura të reja, një rritje prej 9.0% nga viti i kaluar. Automjetet me sisteme alternative të lëvizjes, elektrike ose hibride, përbëjnë tashmë 59.5% të regjistrimeve të reja, duke shënuar një rritje prej 39.6%. Nga to, veturat elektrike të pastra kanë arritur në 36,454 njësi, me një rritje prej 45.2%, hibrid-benzinë në 54,349 njësi, me rritje prej 44.0%, ndërsa hibrid-dizelët në 9,103 njësi, me një rritje prej 4.9%.
Ekspertët e industrisë theksojnë se kjo rritje e fortë tek veturat elektrike dhe hibride është një tregues i qartë i ndryshimit të tregut drejt mjeteve më të pastra, si dhe një sinjal se politikat nxitëse po japin rezultat.
