Zyra e Lartë e Auditimit në Poloni (NIK) ka konkluduar se ndërtimi i parqeve me era në pyjet shtetërore përmes programit “Energy Forest” është në kundërshtim me ligjin.
Sipas raportit të auditimit, organizata përgjegjëse për pyjet shtetërore, Lasy Państwowe (Pyjet Shtetërore), ka dhënë në qira tokë pyjore për kompaninë private të zhvillimit të projekteve me era, duke shkelur dispozitat e Ligjit për Pyjet, i cili nuk lejon përdorimin e pyjeve për qëllime të tilla.
Programi “Energy Forest”, i nisur në dhjetor 2021, parashikonte ndërtimin e parqeve me era në gjashtë zona pyjore lokale, përmes kontratave midis gjashtë administratave pyjore dhe kompanisë Eurowind Energy. Në praktikë, pilotët janë zhvilluar në tre prej këtyre lokacioneve, ndërsa disa zona u hoqën nga programi për shkak të pengesave të ndryshme.
Çdo park i planifikuar përbëhej nga tetë deri në dhjetë turbina era, me lartësi totale që mund të arrinte deri në 250 metra. Auditimi thekson se përfshirja e Pyjeve Shtetërore në procedura që nuk lidhen me menaxhimin pyjor është një shkelje e detyrave të institucionit.
Ky vendim vjen pas kundërshtimeve të organizatave mjedisore dhe ekspertëve, të cilët paralajmëruan se projekti mund të rrezikonte integritetin e ekosistemeve dhe biodiversitetin në pyje. Institucioni shtetëror për mbrojtjen e natyrës kishte kërkuar pezullimin e programit deri në verifikimin ligjor të marrëveshjeve dhe propozimeve.
