Gazprom ka reduktuar në mënyrë drastike pjesëmarrjen e tij direkte në kompaninë e naftës dhe gazit të Serbisë, Naftna Industrija Srbije (NIS), duke mbajtur vetëm një aksion simbolik. Por, teksa ky hap shihet si tërheqje formale nga kontrolli i drejtpërdrejtë, një kompani tjetër ruse ka hyrë në lojë.
Sipas të dhënave zyrtare nga bursa e Beogradit, Intelligence, një kompani me seli në Rusi, ka blerë 11.3% të aksioneve të NIS-it, duke u bërë një nga aksionerët më të mëdhenj të saj.
Në pronësinë e deritanishme, Gazprom Neft – filiali i gjigantit shtetëror rus Gazprom – mbante kontrollin kryesor mbi NIS, duke zotëruar më shumë se 50% të aksioneve. Por reduktimi i pjesëmarrjes direkte të Gazprom në vetëm një aksion ka ngritur pyetje mbi arsyet dhe pasojat e këtij manovrimi.
Burime të tregut theksojnë se kjo lëvizje mund të jetë e lidhur me shmangien e sanksioneve ndërkombëtare ndaj kompanive ruse, ndërkohë që ruhet ndikimi strategjik përmes strukturave të tjera të pronësisë.
NIS është një nga kompanitë më të rëndësishme energjetike në rajon, e angazhuar në prodhimin, përpunimin dhe tregtimin e naftës dhe derivateve, si dhe në furnizimin e gazit natyror. Ndryshimet në aksionerë shihen si zhvillime që mund të ndikojnë drejtpërdrejt jo vetëm sektorin energjetik serb, por edhe sigurinë energjetike rajonale.
