Gjatë vizitës së Presidentit turk Recep Tayyip Erdoğan në Shtëpinë e Bardhë, Turqia dhe Shtetet e Bashkuara kanë nënshkruar një Memorandum Mirëkuptimi për Bashkëpunim Strategjik në Energjinë Bërthamore Civile. Dokumenti u nënshkrua në prani të liderëve të të dy vendeve, si dhe Sekretarit amerikan të Shtetit, Marco Rubio.
Ministri turk i Energjisë, Alparslan Bayraktar, deklaroi se marrëveshja do të thellojë më tej partneritetin “e shumëdimensional” mes dy vendeve në fushën e energjisë bërthamore. Ky hap shihet si një sinjal i qartë për synimin e Ankarasë që të diversifikojë burimet e saj të energjisë dhe të ulë varësinë nga gazi natyror i importuar.
Marrëveshja pason një tjetër kontratë të rëndësishme, ku kompania shtetërore BOTAS nënshkroi marrëveshje për importimin e 75.8 miliardë metra kub gaz natyror të lëngshëm (LNG) me kompanitë Mercuria nga Zvicra dhe Woodside Energy nga Australia.
Turqia ka prej kohësh objektiva ambicioze në energjinë bërthamore. Projekti i parë, centrali Akkuyu në Mersin, i ndërtuar nga kompania ruse Rosatom, pritet të hyjë gradualisht në funksionim në vitin 2026. Në planet afatmesme përfshihen edhe dy centrale të tjera bërthamore, një në Sinop në bregun e Detit të Zi dhe një tjetër në rajonin e Thrakës.
Për këto projekte, qeveria turke ka hapur negociata me partnerë ndërkombëtarë, përfshirë Japoninë, Korenë e Jugut, Kinën dhe Shtetet e Bashkuara. Paralelisht, Ankaraja po shqyrton edhe mundësinë e vendosjes së reaktorëve të vegjël modularë (SMR), të cilët ofrojnë fleksibilitet dhe efikasitet më të lartë, veçanërisht në zonat industriale dhe si plotësues i burimeve të ripërtëritshme.
Ky zhvillim nënvizon përpjekjet e Turqisë për të siguruar një tranzicion energjetik më të balancuar dhe për të forcuar pozitën e saj si një qendër rajonale energjetike.
