Kompania serbe e naftës dhe gazit NIS, e kontrolluar nga aktorë rusë, ka bërë kërkesë për një shtyrje të re në zbatimin e sanksioneve nga Shtetet e Bashkuara. Në një komunikatë për media thuhet se më 28 shtator, NIS i është drejtuar Departamentit të Thesarit të SHBA-së me kërkesë për licencë speciale që të lejojë operacionet e vazhdueshme dhe të shmangë ndërprerje në prodhimin e naftës dhe proceset e përpunimit.
Kjo është një nga disa shtyrje që SHBA-ja i ka dhënë NIS-it që nga shpallja e sanksioneve ndaj sektorit energjetik rus në janar të këtij viti. Presidenti serb Aleksandar Vučić raportoi se Departamenti i Thesarit ka shtyrë zbatimin e sanksioneve për 7-8 ditë, që duhej të hynin në fuqi më 1 tetor.
Sanksionet amerikane synojnë të pengojnë ndikimin e Rusisë në sektorin energjetik ndërkombëtar duke i kërkuar kompanive që të distancohen nga përfshirja në veprimet që përfitojnë strukturat ruse. NIS ka tentuar të largohet nga lista e individëve të veçuar (SDN – Specially Designated Nationals) përmes një kërkese të modifikuar.
NIS menaxhon rafinerinë e vetme të Serbisë në Pančevo, me kapacitet të përpunimit prej 4.8 milionë tonësh në vit, dhe është një komponent kyç i zinxhirit të furnizimeve me naftë në Serbi dhe rajon. Shumica e naftës bruto që kompania përpunon importohet përmes tubacionit Janaf në Kroaci, i cili është pjesë thelbësore e rrugës së furnizimeve.
Nëse sanksionet të zbatohen pa përjashtim, kjo mund të sjellë pasoja serioze për sigurimin e karburanteve dhe stabilitetin energjetik në Serbi, përfshirë ndërprerje në furnizim dhe rritje çmimesh. Analistë të sektorit të energjisë dhe financës paralajmërojnë se ndikime negative mund të prekin ekonominë dhe financat publike në vend.
