Apple ka nënshkruar marrëveshje të rëndësishme për furnizimin me energji të ripërtëritshme në Greqi dhe Rumani, duke u angazhuar që të rrisë konsumin korporativ energjetik nga burime të pastra.
Këto marrëveshje janë pjesë e një projekti më të gjerë që përfshin zhvillimin e rreth 650 MW kapaciteteve të energjisë së ripërtëritshme në shtatë shtete evropiane, duke përfshirë Spanjën, Italinë, Letoninë, Poloninë dhe Rumani, dhe synojnë të mbështesin përdorimin e energjisë së pastër për pajisjet e Apple, përfshirë iPhone dhe Mac.
Në Greqi, Apple ka nënshkruar një marrëveshje afatgjatë me një impiant diellor me kapacitet 110 MW në Kozani, në veri të vendit, i cili tashmë është në funksion. Në Rumani, kompania do të sigurojë energji nga një park eolik me kapacitet 99 MW në qarkun Galați, përmes një marrëveshjeje virtuale furnizimi me energji (vPPA). Ky projekt pritet të fillojë operimin në gjysmën e parë të vitit 2026.
Sipas nënkryetares së Apple për mjedisin, politikat dhe iniciativat shoqërore, Lisa Jackson, këto projekte janë një hap i rëndësishëm drejt një të ardhmeje më të qëndrueshme dhe të gjelbër për konsumatorët e saj.
Angazhimi i kompanisë synon që deri në vitin 2030, e gjithë energjia e përdorur për ngarkimin dhe funksionimin e pajisjeve të Apple të jetë e bazuar në burime të ripërtëritshme, duke kontribuar në uljen e ndikimit mjedisor dhe në përmirësimin e efikasitetit energjetik global.
Këto nisma kanë gjithashtu rëndësi për rajonin e Ballkanit, përfshirë Kosovën, pasi mbështesin zhvillimin e mëtejshëm të infrastrukturës së energjisë ripërtëritshme dhe promovimin e qëndrueshmërisë mjedisore.
Investimet e kompanive ndërkombëtare si Apple në projekte energjetike në Evropë dhe rajon dërgojnë një sinjal pozitiv për mundësitë e zhvillimit të sektorit ripërtëritshëm dhe për bashkëpunimin rajonal në fushën e energjisë.
