Agjencia e Statistikave të Kosovës (ASK) ka publikuar të dhënat e fundit për sektorin e energjisë për muajin gusht 2025, sipas të cilave energjia elektrike bruto në dispozicion ishte 502.12 GWh, ndërsa konsumi i energjisë elektrike arriti në 411.92 GWh. Ky nivel paraqet një rritje prej 1.29 për qind krahasuar me gushtin e vitit 2024.
ASK bën të ditur se pjesëmarrja e energjisë elektrike alternative – që përfshin burime të ripërtëritshme si era dhe dielli – në kuadër të konsumit të përgjithshëm ishte 7.78 për qind. Kjo tregon një përmirësim të lehtë në drejtim të diversifikimit të burimeve të furnizimit dhe uljes së varësisë nga prodhimi tradicional me thëngjill.
Megjithatë, të dhënat theksojnë një rënie të dukshme në prodhimin vendor, sidomos nga termocentralet e Korporatës Energjetike të Kosovës (KEK), çka ka ndikuar në rritjen e importeve për të plotësuar kërkesën e brendshme.
Rriten importet dhe eksportet energjetike, si dhe prodhimi nga burimet e ripërtëritshme
Gjatë muajit gusht 2025, importi i energjisë elektrike u rrit me 69.95 për qind krahasuar me të njëjtën periudhë të vitit të kaluar.
Në total, u importuan 360.623 GWh energji elektrike, ndërsa në gushtin e vitit 2024 kjo sasi ishte 212.197 GWh. Në anën tjetër, eksporti i energjisë elektrike – përfshirë edhe sasitë e transmetimit – arriti në 243.28 GWh, duke u rritur me 48.06 për qind në krahasim me vitin paraprak.
Në krahasim me gushtin e vitit 2024, prodhimi nga thëngjilli ka shënuar rënie prej 19.32 për qind, ndërsa prodhimi nga hidrocentralet është ulur me 19.40 për qind.
Në të kundërt, prodhimi nga era dhe dielli ka shënuar rritje të konsiderueshme prej 32.22 për qind, duke reflektuar rritjen graduale të kapaciteteve të instaluara nga burime të ripërtëritshme dhe një menaxhim më efikas të prodhimit gjatë muajve verorë.
