Dy vjet pasi Gjermania hoqi subvencionet për automjetet elektrike, një veprim që shkaktoi një rënie të ndjeshme të kërkesës, vendi po përgatitet t’i rikthejë ato.
Programi i ri i blerjes do të hyjë në fuqi në janar 2026.
Skema e re do të futet në një kohë vendimtare për industrinë evropiane të veturave, ndërsa ajo përballet me tarifat e importit të vendosura nga SHBA, por edhe me konkurrencën e re nga Kina.
Kancelari gjerman Friedrich Merz zbuloi më parë këtë javë se 3 miliardë euro do të ndahen për subvencione për blerjen e automjeteve me emetime zero deri në vitin 2029, duke synuar familjet me të ardhura të ulëta dhe të mesme.
Besohet se programi do të ofrojë subvencione me vlerë deri në 4,000 euro për blerjen e një automjeti të ri elektrik, çmimi i të cilit është më i ulët se 45,000 euro.
Ky është një ndryshim i madh krahasuar me programin e mëparshëm, i cili kishte një limit çmimi më të lartë prej 65,000 eurosh.
Është e rëndësishme të theksohet se automjetet hibride plug-in nuk do të përfshihen në program, megjithëse veturat elektrike të përdorura do të jenë gjithashtu pjesë e programit për herë të parë.
Ndërsa disa detaje të programit janë ende duke u negociuar, pritet që të ardhurat të kufizohen në rreth 45,000 euro.
Duke folur për subvencionet e reja, Sekretari i Përgjithshëm i Partisë Social Demokrate, Tim Kluessendorf, tha se “të gjithë duhet të jenë në gjendje të përballojnë tranzicionin elektrik”.
“Ajo që është e rëndësishme për mua kur hartoj programin e subvencioneve është se ai duhet të jetë në dobi të veçantë të industrisë automobilistike gjermane dhe evropiane. Ministria e Mbrojtjes së Mjedisit do të sigurojë që kjo të ndodhë. E ardhmja është elektrike dhe ne duam që ajo të shkruhet në Gjermani”, tha ai.
Deklarata e tij sugjeron që subvencionet mund të kufizohen vetëm në automjetet e prodhuara nga prodhuesit evropianë, megjithëse nuk ka konfirmim zyrtar.
