Operatori i Sistemit të Shpërndarjes së Energjisë Elektrike (OSSH) në Shqipëri ka njoftuar se në fund të shtatorit 2025, niveli i humbjeve në rrjetin e shpërndarjes së energjisë zbriti në 16,24%, një përmirësim i ndjeshëm krahasuar me 45% në vitin 2013 dhe 17,23% në të njëjtën periudhë të vitit 2024.
Ky progres, sipas OSSH-së, është rezultat i investimeve në rrjet dhe teknologji, si dhe i përmirësimeve në menaxhim, organizim strukturor dhe kontrolleve të vazhdueshme në terren për formalizimin e sektorit energjetik.
Qeveria ka përcaktuar si objektiv uljen e mëtejshme të humbjeve nën 12% deri në vitin 2029, përmes vendosjes së matësve inteligjentë që mundësojnë matje të sakta, transmetim në kohë reale dhe faturim të drejtë për konsumatorët.
Humbjet në rrjet ndahen në dy kategori, humbje teknike, për shkak të rrjetit të amortizuar që kërkon modernizim dhe humbje joteknike, që përfshijnë abuzimet me energjinë, të cilat do të monitorohen më rreptësisht.
Falë investimeve në vitet e fundit, kapacitetet energjetike janë dyfishuar nga 1,768 MW në 2013 në 3,298 MW, ndërsa humbjet janë ulur ndjeshëm, duke kontribuar në rritjen e stabilitetit financiar të sektorit energjetik.
