BE-ja, sipas saj, mbështet Serbinë që të diversifikojë burimet e energjisë dhe të integrohet në rrjetet energjetike të BE-së.
Komisarja e Bashkimit Evropian për Zgjerim, Marta Kos, ka hedhur poshtë pretendimet se Serbia do të ndalohet të marrë gaz rus, duke theksuar se vendimi i Këshillit të Bashkimit Evropian për të ndaluar importin dhe transitin e gazit rus nuk ndikon në furnizimin e Serbisë.
“Bashkimi Evropian nuk e ndërpret furnizimin e Serbisë. Këto janë gënjeshtra. Përkundrazi, BE-ja mbështet Serbinë që të diversifikojë burimet e energjisë dhe të integrohet në rrjetet energjetike të BE-së,” deklaroi Kos gjatë një fjalimi para Parlamentit Evropian më 21 tetor, në kuadër të debatit mbi rezolutën për Serbinë.
Komisarja gjithashtu kritikoi lidhjet e ngushta të Serbisë me Moskën dhe Pekinin, të cilat, sipas saj, shoqërohen me retorikë armiqësore ndaj BE-së dhe janë në kundërshtim me vlerat dhe standardet evropiane. Kos theksoi se Brukseli pret nga Serbia një zgjedhje strategjike dhe hapa konkretë në drejtim të parimeve demokratike dhe reformave.
Fokusi i debatit ishte gjithashtu gjendja e vendit një vit pas aksidentit tragjik më 1 nëntor 2024 në stacionin hekurudhor në Novi Sad, ku humbën jetën 16 persona dhe një person u plagos rëndë. Ky aksident shkaktoi protesta masive, ndërsa autoritetet refuzuan të pranojnë përgjegjësinë.
Kos nënvizoi nevojën që veprimet policore dhe trajtimi i protestave të jenë proporcionale dhe të respektojnë të drejtat themelore të qytetarëve.
“Prioritet është të hetohen të gjitha pretendimet për përdorim të tepruar të forcës,” shtoi ajo, duke dënuar gjithashtu çdo akt urrejtjeje, vandalizmi ose dhune gjatë protestave dhe duke bërë thirrje për uljen e tensioneve.
