Kompania rumune e furnizimit dhe shpërndarjes së energjisë, Electrica, ka nisur procedurat për marrjen e lejeve për ndërtimin e 15 parqeve të ruajtjes së energjisë me bateri (BESS), me një kapacitet total prej afërsisht 1 GWh, me qëllim rritjen e fleksibilitetit të rrjetit kombëtar dhe mbështetjen e integrimit të burimeve të ripërtëritshme të energjisë.
Sipas njoftimit të kompanisë, këto sisteme do t’i mundësojnë Electrica-s të përgjigjet në mënyrë dinamike ndaj luhatjeve të konsumit dhe prodhimit në sistemin energjetik kombëtar, duke ndihmuar në integrimin më efikas të kapaciteteve të reja ripërtëritëse, si dhe në uljen e paqëndrueshmërisë së çmimeve dhe varësisë nga importet.
“Zhvillimi i kësaj infrastrukture ruajtjeje prej 1 GWh është një shtyllë strategjike në transformimin e Electrica-s në një lider të tranzicionit energjetik,” – thuhet në deklaratën e kompanisë, duke theksuar se sistemet e baterive do të ndërtohen në pronat ekzistuese të saj.
Drejtori i Përgjithshëm i Electrica-s, Alexandru Chirița, u shpreh se projekti ka një afat “ambicioz” dhe nuk ka të bëjë vetëm me teknologjinë apo kapacitetin, por me riformësimin e mënyrës se si Rumania do të menaxhojë sigurinë energjetike në dekadat e ardhshme.
Ky projekt është pjesë e strategjisë “Electrica 2030” dhe do të zhvillohet në faza, me instalime të shpërndara në të gjithë territorin e Rumanisë. Faza e parë pritet të vihet në funksion gjatë vitit 2025, sipas raportimeve të PVknowhow.com.
Ruajtja e energjisë me bateri po bëhet një tjetër shtyllë e tranzicionit energjetik të Rumanisë, me investime gjithnjë e më të shumta në sisteme BESS të kombinuara me kapacitete diellore, ujore dhe me erë, por edhe si njësi të pavarura ruajtjeje.
Rumania po mbështet projektet e ruajtjes së energjisë përmes subvencioneve nga Plani Kombëtar i Rimëkëmbjes dhe Qëndrueshmërisë (NRRP). Në shtator të vitit të kaluar, Ministria e Energjisë miratoi grante për 13 projekte të tilla.
