Gjatë vizitës së presidentit francez Emmanuel Macron në Slloveni, dy vendet nënshkruan një deklaratë për bashkëpunim afatgjatë në fushën e energjisë bërthamore, duke shënuar një hap të rëndësishëm në forcimin e marrëdhënieve energjetike mes tyre.
Sipas deklaratës, Sllovenia dhe Franca do të bashkëpunojnë në zhvillimin teknik, ndërtimin dhe operimin e një njësie të re në centralin ekzistues bërthamor Krsko (“Krsko 2”), ku janë paraqitur ofertat nga EDF dhe Westinghouse Electric Company.
Ky bashkëpunim do t’i mundësojë Sllovenisë të zgjedhë ndërmjet teknologjive të ndryshme, përfshirë edhe atë franceze, si pjesë e projektit që synon jo vetëm përmbushjen e nevojave të brendshme për energji, por edhe një dimension më të gjerë rajonal të furnizimit të qëndrueshëm me energji elektrike.
Presidenti Macron deklaroi se Franca synon të jetë partnere strategjike, e jo vetëm komerciale, në këtë bashkëpunim – duke përfshirë aspektet industriale, teknologjike dhe integrimin e zinxhirit të vlerës bërthamore në Evropë.
