Oda Ekonomike e Maqedonisë së Veriut ka zhvilluar udhëzuesin e parë të vendit për dekarbonizimin e bizneseve të vogla. Ky mjet digjital synon të ndihmojë ekonominë e vendit të përshtatet me rregullat ndërkombëtare për klimën, përfshirë edhe taksën kufitare të karbonit të Bashkimit Evropian (CBAM).
Udhëzuesi ofron udhëzime të detajuara për mënyrat më efektive që kompanitë lokale të reduktojnë gjurmën e tyre të karbonit, si pjesë e përpjekjeve globale kundër ndryshimeve klimatike.
Një veçori kryesore është kalkulatori i gjurmës së karbonit, që mbulon gati 60 burime energjie dhe ftohës të ndryshëm. Platforma përfshin gjithashtu informacione mbi rregulloret klimatike të BE-së dhe ato vendore, si dhe mundësi financimi në formë subvencionesh.
Në të gjenden raste studimore praktike dhe histori suksesi të kompanive udhëheqëse që tregojnë përfitimet e energjisë së pastër.
Sipas ministres së Energjetikës, Minierave dhe Burimeve Minerale të Maqedonisë së Veriut, Sanja Božinovska, “Udhëzuesi për dekarbonizim shënon një pikë kthese në tranzicionin e gjelbër të vendit tonë, duke pajisur bizneset me mjetet që u nevojiten për të vepruar tani.”
Udhëzuesi është zhvilluar në bashkëpunim me ekipin këshillues të Bankës Evropiane të Investimeve (EIB) dhe Delegacionin e BE-së në Maqedoninë e Veriut, dhe u prezantua në Shkup para më shumë se njëqind sipërmarrësve nga sektorë të ndryshëm të ekonomisë.
Qëllimi i tij është të ndihmojë kompanitë të reduktojnë emetimet e gazeve serrë dhe të përshtaten me rregullat klimatike ndërkombëtare, pa humbur konkurrueshmërinë. Një nga këto rregulla është mekanizmi i ri i BE-së për rregullimin kufitar të karbonit (CBAM), që pritet të hyjë në fuqi më 1 janar 2026.
Sipas Björn Gabriel, kreut të përfaqësisë së EIB në Maqedoninë e Veriut, ky udhëzues vjen në një moment kyç, ndërsa vendi përparon në tranzicionin e gjelbër dhe përgatitet për rregulloret e reja klimatike.
Ndërsa shefi i Delegacionit të BE-së në Maqedoninë e Veriut, Michalis Rokas, theksoi se dekarbonizimi, efiçienca e energjisë dhe burimet e ripërtëritshme janë mjete të fuqishme për ndërtimin e një ekonomie më inovative, rezistente dhe konkurruese. Ai shtoi se nëse çdo ndërmarrje e vogël dhe e mesme ndërmerr disa hapa drejt praktikave më të gjelbra, ndikimi i përbashkët në mbi 68,000 biznese do të jetë vërtet transformues.
Udhëzuesi është i disponueshëm në faqen zyrtare të Odës Ekonomike të Maqedonisë së Veriut, si platformë interaktive digjitale, zhvilluar me financim nga EIB Global.
