Panairi i Energjisë, Ndërtimit dhe Ekonomisë së Gjelbër 2025 rikthehet më 29–30 tetor në Pallatin e Kongreseve të Tiranës, duke u shndërruar përsëri në një prej ngjarjeve kryesore në Shqipëri për sektorët e energjisë, ndërtimit dhe inovacionit të gjelbër.
Edicioni i këtij viti zhvillohet me moton “Eficienca energjetike”, duke u përqendruar në teknologjitë që mund të reduktojnë humbjet, konsumojnë më pak energji dhe rrisin qëndrueshmërinë e ndërtesave dhe infrastrukturës urbane. Ky panair — i katërti me rradhë — pritet të sjellë së bashku rreth 80 kompani nga Shqipëria, rajoni dhe Evropa, që do të prezantojnë zgjidhje inovative në fusha si energjia, materiali i ndërtimit, teknologjitë smart dhe mobiliteti i qëndrueshëm.
Aktivitetet dhe temat kryesore
Programi i panairit përfshin forume diskutimi e panele tematike: në ditën e parë, më 29 tetor, do të zhvillohet ceremonia hapëse dhe Forumi i Investimeve në Pasuri të Paluajtshme, ku ekspertë dhe aktorë të industrisë do të diskutojnë sfidat dhe perspektivat e projekteve ndërtimore.
Në ditën e dytë, më 30 tetor, fokusi do të jetë në eficiencën energjetike dhe inovacionin, me panele që adresojnë teknologji që mund të bëjnë ndërtesat më kursyese dhe që përfitojnë nga burimet e ripërtëritshme.
Panairi do të jetë i hapur për publikun pa pagesë, dhe kërkohet vetëm një regjistrim i thjeshtë për hyrje.
Rëndësia për Shqipërinë dhe rajonin
Ky panair ofron një platformë të rëndësishme për bashkëpunim rajonal dhe ndërkombëtar, për shkëmbim teknologjish, ide dhe partneritete në fushat e energjisë së gjelbër dhe konstruktimeve të qëndrueshme.
Pjesëmarrja e kompanive nga Kosovë, Bullgari, Poloni, Çeki, Gjermani dhe vende të tjera nënvizon rëndësinë e rrjetëzimit dhe integrimit të tregjeve teknologjike dhe energjetike në rajon.
Duke promovuar konceptin Smart. Green. Sustainable., organizatorët shpresojnë që transformimi që fillon sot të jetë baza e një të ardhmeje më qëndrueshme për qytetet tona.
Energy Monitor do të ndjekë zhvillimet e panairit dhe do të raportojë për projektet dhe teknologjitë më të rëndësishme që dalin prej tij, me fokus të veçantë në ato që mund të kenë ndikim për tregun energjetik të Kosovës.
