Kryesuesi i Bordit të Zyrës së Rregullatorit për Energji (ZRRE), z. Ymer Fejzullahu, ka përfaqësuar Kosovën në takimin e rregullt të Asociacionit Rajonal të Rregullatorëve të Energjisë (Energy Regulators Regional Association – ERRA), i cili mblodhi përfaqësues nga vendet anëtare dhe të asociuara të kësaj organizate.
Takimi, që shërben si një platformë e rëndësishme për shkëmbim përvojash dhe diskutim të zhvillimeve rregullative, u përqendrua në çështjet kyçe që prekin sektorin energjetik në rajon, me theks të veçantë te çmimet e energjisë elektrike për konsumatorët familjarë dhe pavarësia e institucioneve rregullatore.
Në diskutimet e mbajtura u theksua rëndësia e pavarësisë institucionale dhe financiare të rregullatorëve të energjisë, si një nga shtyllat themelore për funksionim të mirë dhe vendimmarrje të paanshme në tregun energjetik. Kjo pavarësi u vlerësua si kusht i domosdoshëm për të siguruar transparencë, konkurrencë të drejtë dhe një ambient rregullativ që nxit zhvillimin e tregut të hapur dhe të qëndrueshëm.
Gjatë takimit, pjesëmarrësit diskutuan edhe mbi aktivitetet e komiteteve punuese të ERRA-s, përfshirë ato për konsumatorët, energjinë elektrike, gazin dhe tranzicionin e energjisë. Këto sesione ofruan një panoramë të gjerë mbi sfidat dhe arritjet në secilin sektor, duke nxitur bashkëpunim dhe koordinim më të mirë ndërmjet vendeve pjesëmarrëse.
Në përfundim të takimit, anëtarët e ERRA-s theksuan nevojën për bashkëpunim më të ngushtë ndërmjet vendeve anëtare dhe të asociuara, si një parakusht për ndërtimin e një tregu energjetik rajonal transparent, konkurrues dhe të harmonizuar me praktikat më të mira evropiane dhe ndërkombëtare. ZRRE mbetet e përkushtuar të kontribuojë në këtë drejtim, duke avancuar kornizat rregullative dhe duke siguruar mbrojtje të interesave të konsumatorëve dhe zhvillim të qëndrueshëm të tregut të energjisë në Kosovë.
