Zelenskyy theksoi se misioni i koalicionit do të jetë forcimi i infrastrukturës energjetike të Ukrainës dhe mobilizimi i burimeve financiare për importet e energjisë elektrike nëse është e nevojshme
Presidenti ukrainas, Volodymyr Zelenskyy, ka njoftuar formimin e një Koalicioni Ndërkombëtar të Energjisë për të mbështetur sektorin energjetik të Ukrainës dhe për të siguruar infrastrukturën energjetike mes sulmeve ruse, transmeton Anadolu.
Duke folur në Kiev gjatë një takimi me ministrin holandez të Punëve të Jashtme, David van Wiel, Zelenskyy tha se takimi i parë do të zhvillohet online në ditët në vijim.
“Kohëve të fundit, pas shumë sulmeve masive ndaj Ukrainës, në sektorin tonë të energjisë, logjistikën, furnizimin me ujë, furnizimin me gaz, u mor një vendim për të organizuar një koalicion për të mbështetur sektorin e energjisë dhe sigurinë energjetike të ukrainasve”, tha Zelenskyy.
Siç raporton agjencia shtetërore e lajmeve “Ukrinform”, Zelenskyy theksoi se misioni i koalicionit do të jetë forcimi i infrastrukturës energjetike të Ukrainës dhe mobilizimi i burimeve financiare për importet e energjisë elektrike nëse është e nevojshme.
“Falë Zotit, ne jemi të lidhur me rrjetin evropian të energjisë, që do të thotë se kemi kapacitetet, por mund të na duhet financim për importet”, shtoi ai.
Presidenti ukrainas falënderoi Holandën, e cila më herët gjatë ditës njoftoi një pakete të ndihmës për energjinë në vlerë prej 25 milionë eurosh.
Ai gjithashtu tha se është në bisedime me kancelarin gjerman, Friedrich Merz dhe kryeministren italiane, Giorgia Meloni, për blerjen e pajisjeve shtesë për prodhimin e energjisë.
Pas vizitës së tij në Norvegji, presidenti ukrainas tha se vendi i tij do të marrë rreth 150 milionë dollarë për blerjet e gazit dimëror, paketën e tretë të mbështetjes së energjisë nga Oslo këtë vit.
Ministrja gjermane e Ekonomisë dhe Energjisë, Katherina Reiche, gjithashtu njoftoi se kontributi total i Gjermanisë në Fondin e Mbështetjes së Energjisë së Ukrainës do të arrijë në 450 milionë euro.
/aa.com.tr
