Fondi i Kosovar për Garanci Kreditore (FKGK) dhe BKT Kosovo kanë rinovuar dhe zgjeruar marrëveshjen për kreditë për ndërmarrjet e vogla dhe të mesme, duke e bërë më të lehtë për kompanitë vendore të investojnë në zhvillim, modernizim dhe projekte “të gjelbra” apo energjetike.
Sipas marrëveshjes së përditësuar, mbulimi me garanci është rritur në 70% nga 50%, ndërsa ekspozimi maksimal i kredisë është ngritur në 7 milionë euro. Kredia maksimale për secilin klient tani mund të arrijë deri në 3 milionë euro, me afat kthimi deri në 10 vjet. Për më tepër, tarifat e garancisë janë ulur, duke e bërë financimin më të përballueshëm për NVM-të.
Ky program, që funksionon prej disa vitesh, synon të lehtësojë qasjen në financim për bizneset vendore, duke mbështetur rritjen e kapaciteteve, efikasitetin energjetik dhe investime në projekte të qëndrueshme.
Partneriteti mes FKGK dhe BKT ka mundësuar deri tani lëshimin e qindra miliona euro kredish të garantuara, duke kontribuar drejtpërdrejt në zhvillimin ekonomik të Kosovës dhe në tranzicionin drejt një ekonomie më “të gjelbër”.
