Konsorciumi i përbërë nga KONÇAR dhe Siemens Energy ka nënshkruar kontratë me INA për ndërtimin e një impianti të prodhimit, shpërndarjes dhe magazinimit të hidrogjenit. Vlera e punimeve të kontraktuara arrin 22.5 milionë euro.
Projekti përfshin furnizimin, instalimin dhe dorëzimin e pajisjeve dhe materialeve, punimet ndërtimore, si dhe vënien në funksion të impiantit, i cili do të ketë sistem elektrolize, sisteme kontrolli dhe monitorimi, si dhe infrastrukturë mbështetëse për funksionim të sigurt dhe të besueshëm.
Ky është impianti i parë i këtij lloji në Kroaci dhe përfaqëson një hap të rëndësishëm drejt energjisë së pastër, me synim reduktimin e emetimeve dhe rritjen e qëndrueshmërisë energjetike.
INA ka njoftuar se projekti do të përfshijë një elektrolizor me kapacitet 10 MW, i cili do të furnizohet me energji të ripërtëritshme për prodhimin e hidrogjenit të gjelbër. Hidrogjeni i prodhuar do të përdoret si në procese industriale, ashtu edhe në aplikime komerciale.
Ky zhvillim tregon se investimet në teknologjitë e hidrogjenit po bëhen pjesë kyçe e strategjive kombëtare dhe rajonale për tranzicion të gjelbër dhe reduktim të emetimeve, duke hapur rrugën për projekte të tjera moderne dhe të qëndrueshme në sektorin energjetik.
