Korporata Energjetike e Kosovës (KEK) ka njoftuar se projekti strategjik “Solar4Kosovo I Photovoltaics”, që parasheh ndërtimin e një parku solar fotovoltaik me kapacitet minimal prej 100 megavatësh, ka hyrë zyrtarisht në fazën e tenderimit për implementim.
Sipas KEK-ut, në fillim të kësaj jave është publikuar Ftesa për Përzgjedhje Fillestare (Parakualifikim) për dizajnimin, furnizimin dhe instalimin e impiantit, sipas procedurave të FIDIC Yellow Book. Projekti është një nga investimet më të rëndësishme të tranzicionit energjetik në Kosovë dhe është bashkëfinancuar nga Bashkimi Evropian përmes WBIF-it, Qeveria Gjermane përmes KfW-së, si dhe nga Banka Evropiane e Investimeve (EIB).
Parku solar do të ndërtohet në ish-deponinë e hirit të qymyrit në veriperëndim të Prishtinës, duke shndërruar një zonë të degraduar mjedisore në një kapacitet modern për prodhimin e energjisë së pastër.
Thirrje për pjesëmarrje transparente dhe konkurruese
KEK, si institucion përfitues i projektit, u ka bërë thirrje kompanive vendore dhe ndërkombëtare që plotësojnë kriteret profesionale, teknike dhe financiare, dhe që kanë përvojë në dizajnimin dhe ndërtimin e impianteve fotovoltaike apo projekteve të mëdha energjetike, të aplikojnë në këtë proces. Zyrtarët theksojnë se procedurat do të jenë plotësisht transparente, me synim sigurimin e konkurrencës së gjerë dhe pjesëmarrjes së operatorëve me kapacitet të lartë profesional.
Projekti “Solar4Kosovo I Photovoltaics” paraqet një mundësi të rëndësishme zhvillimore për sektorin energjetik, industrinë e ndërtimit dhe kompanitë teknologjike, ndërsa pritet të krijojë hapësirë për partneritete të reja ndërkombëtare në sektorin e energjisë së ripërtëritshme.
