Finlanda ka hapur minierën e saj të parë të litiumit, me synimin për të forcuar zinxhirin evropian të furnizimit për prodhimin e baterive.
Kompania minerare Keliber ka nisur nxjerrjen e litiumit në pjesën perëndimore të vendit, duke shënuar fillimin e operacionit të parë në Evropë për prodhimin e litiumit të përpunuar në standardin e kërkuar për bateri. Lajmi është raportuar nga transmetuesi publik Yle.
Projekti, i planifikuar prej disa vitesh, synon të vendosë themelet për prodhimin e parë evropian të litiumit me cilësi të lartë për industrinë e baterive, duke reduktuar varësinë nga importet jashtë kontinentit, njofton Energy Monitor.
Drejtori ekzekutiv i kompanisë, Hannu Hautala, theksoi se prodhimi brenda Evropës përbën një avantazh të rëndësishëm konkurrues.
Sipas tij, distanca më e shkurtër e furnizimit krahasuar me importet nga Kina do të sjellë përfitime si në kosto ashtu edhe në siguri të zinxhirit të furnizimit.
