Bosnje dhe Hercegovina ka nisur zyrtarisht procesin për hartimin e Strategjisë Kombëtare të Hidrogjenit, një hap i rëndësishëm drejt modernizimit të sektorit energjetik dhe zhvillimit të burimeve të energjisë së ripërtëritshme.
Projekti “Mbështetje për zhvillimin e strategjisë së hidrogjenit dhe transferimin e ekspertizës për Bosnje dhe Hercegovinën” ka filluar në Sarajevë, me qëllim krijimin e një kornize të qartë strategjike për prodhimin, përdorimin dhe integrimin e hidrogjenit në sistemin energjetik të vendit.
Procesi i hartimit pritet të zgjasë rreth dy vjet dhe do të përfshijë përgatitjen e një dokumenti strategjik dhe të një plani veprimi konkret. Në fokus do të jenë identifikimi i projekteve prioritare, përcaktimi i standardeve teknike dhe rregullative, zhvillimi i kapaciteteve njerëzore, si dhe mundësitë për bashkëpunim rajonal dhe ndërkufitar në tregun e ardhshëm të hidrogjenit.
Në këtë iniciativë pritet të përfshihen institucionet relevante shtetërore, kompanitë energjetike dhe partnerë ndërkombëtarë, me synimin që vendi të pozicionohet në mënyrë konkurruese në zhvillimet e reja të tregut evropian të energjisë.
Nisma për strategjinë e hidrogjenit vjen në një moment kur Bosnje dhe Hercegovina po intensifikon përpjekjet për tranzicion energjetik, reduktim të emetimeve dhe diversifikim të burimeve të energjisë, në përputhje me objektivat evropiane për dekarbonizim dhe siguri energjetike.
