Kroacia ka konfirmuar potencial të konsiderueshëm gjeotermal në katër lokacione, një zhvillim që pritet të mbështesë zgjerimin e përdorimit të energjisë së ripërtëritshme, veçanërisht për sistemet e ngrohjes qendrore.
Agjencia Kroate e Hidrokarbureve ka përmbyllur me sukses aktivitetet e eksplorimit në kuadër të programit kombëtar për vlerësimin e burimeve gjeotermale. Rezultatet e sondimeve kanë konfirmuar praninë e burimeve me potencial të lartë për shfrytëzim termik.
Një nga lokacionet është Zaprešiçi, pranë Zagrebit, ku sondimet kanë arritur në thellësi mbi 1,600 metra. Temperaturat e regjistruara nëntokësore konsiderohen të përshtatshme për zhvillimin e sistemeve të ngrohjes qendrore dhe për përdorime të tjera energjetike.
Tre lokacionet e tjera ku është konfirmuar potenciali gjeotermal janë Velika Gorica, Osijeku dhe Vinkovci. Studimet e realizuara në këto zona tregojnë mundësi reale për zhvillimin e projekteve gjeotermale në shkallë më të gjerë, përcjell Energy Monitor.
Programi i eksplorimit është financuar në kuadër të Planit Kombëtar të Rimëkëmbjes dhe Qëndrueshmërisë, me një buxhet prej rreth 50.8 milionë eurosh. Projekti përfshin jo vetëm hulumtimin dhe verifikimin e burimeve, por edhe përgatitjen e bazës teknike për zhvillimin e ardhshëm të kapaciteteve gjeotermale.
Ky zhvillim përforcon përpjekjet e Kroacisë për të diversifikuar burimet energjetike dhe për të rritur pjesëmarrjen e energjisë së ripërtëritshme në sistemin kombëtar, duke reduktuar varësinë nga lëndët djegëse fosile.
/Energy Monitor
