“Do të nënshkruajmë 3 gigavat energji të ripërtëritshme dhe magazinim deri në COP31”, tha Abunayyan për Anadolu, në një intervistë në margjinat e ceremonisë së nënshkrimit në lstanbul për projektet e centraleve diellore në Sivas dhe Taşeli.
Turqia dhe kompania saudite ACWA Power pritet të nënshkruajnë fazën e dytë të bashkëpunimit për energjinë e ripërtëritshme prej 5 gigavatësh gjatë samitit të OKB-së për klimën COP31, që do të mbahet më vonë këtë vit në Antalia, tha për Anadolu kryetari i ACWA-s, Mohammad Abunayyan.
Nënshkrimi i planifikuar do të mbulojë 3 gigavatët e mbetur të kapacitetit në kuadër të marrëveshjes ndërqeveritare mes dy vendeve, pas marrëveshjes së kësaj jave për fazën e parë prej 2 gigavatësh projekte diellore në provincat qendrore të Turqisë, Sivas dhe Karaman.
“Do të nënshkruajmë 3 gigavat energji të ripërtëritshme dhe magazinim deri në COP31”, tha Abunayyan të premten për Anadolu, në margjinat e ceremonisë së nënshkrimit në Istanbul për projektet e centraleve diellore në Sivas dhe Taşeli.
Ai shtoi se faza e re “do të jetë një kombinim i energjisë diellore, asaj të erës dhe magazinimit”, duke theksuar se kompania po shqyrton edhe integrimin e sistemeve të magazinimit në projektet fillestare diellore prej 2 gigavatësh.
Faza e parë, e nënshkruar këtë javë, është pjesë e një kuadri më të gjerë prej 5 gigavatësh, për të cilin u ra dakord gjatë vizitës së presidentit të Türkiyes, Recep Tayyip Erdoğan, në Arabinë Saudite më 3 shkurt.
Abunayyan tha se ndërtimi i kapacitetit diellor prej 2 gigavatësh pritet të nisë vitin e ardhshëm, pas përfundimit të lejeve dhe miratimeve mjedisore, ndërsa prodhimi i parë i energjisë synohet për fillimin e vitit 2028.
“Do të fillojmë furnizimin me energjinë e parë të këtyre 2 gigavatëve në fillim të vitit 2028 dhe do të arrijmë prodhim të plotë gjatë vitit 2028,” tha ai, duke e cilësuar projektin si një “proces shumë të përshpejtuar”.
COP31, i planifikuar për datat 9–20 nëntor, do të mbahet në qytetin mesdhetar të Antalias, ndërsa samiti i liderëve pritet të zhvillohet në Stamboll. Pothuajse 200 vende pritet të marrin pjesë në bisedimet e OKB-së për klimën, të fokusuara në zbatimin e Marrëveshjes së Parisit, përfshirë uljen e emetimeve, përshtatjen ndaj ndryshimeve klimatike, financimin klimatik dhe mekanizmat e tregut të karbonit.
Objektivi i Turqisë për 120 GW energji të ripërtëritshme
Abunayyan tha se projektet e para do të ofrojnë çmimet më konkurruese të energjisë elektrike në Turqi, duke përfshirë përmbajtje vendore dhe kontraktorë turq. “Do të ofrojë koston më konkurruese që mund të imagjinohet në Turqi”, tha ai. “Do të sigurojë përmbajtje vendore.”
Ai vlerësoi strategjinë e Turqisë për energjinë e ripërtëritshme, duke e quajtur atë “një strategji të shkëlqyer” dhe “ambicioze”, dhe përmendi synimin e vendit për të shtuar 80 gigavat kapacitet të ri deri në vitin 2035.
“Ky projekt … është në fakt fillimi i këtyre 80 gigavatëve”, tha ai.
Turqia synon të rrisë kapacitetin total të instaluar të energjisë diellore dhe të erës në 120 gigavat deri në vitin 2035, çka nënkupton shtimin e rreth 80 gigavatëve krahasuar me nivelet aktuale. Për ta arritur këtë objektiv, vendit do t’i duhet të instalojë afërsisht 9 gigavat kapacitet të ri çdo vit.
Abunayyan e lidhi gjithashtu fazën e ardhshme me rëndësinë diplomatike të samitit të klimës.
“Nuk mund të gjejmë një rast më të mirë se COP31 për t’i treguar gjithë botës partneritetin mes Turqisë dhe Arabisë Saudite,” tha ai. “Turqia dhe Arabia Saudite nuk po bëjnë vetëm premtime apo deklarata, por po i zbatojnë ato”.
Investimi total në kuadër të marrëveshjes prej 5 gigavatësh pritet të arrijë në 4–5 miliardë dollarë, shtoi ai, duke theksuar se bashkëpunimi do ta forcojë ndjeshëm marrëdhënien ekonomike mes dy vendeve.
Sa i përket financimit, Abunayyan tha se projektet do të ndjekin një strukturë financimi projekti, duke kombinuar kapitalin vetjak me borxh ndërkombëtar.
“Shumë institucione financiare do të jenë pas këtij projekti dhe do ta bëjnë atë realitet”, tha ai, duke përmendur përmirësimin e kushteve ekonomike dhe vlerësimeve kreditore në Turqi. Mbyllja financiare synohet për vitin 2027.
Përtej energjisë diellore dhe asaj të erës, Abunayyan tha se ACWA-ja po eksploron gjithashtu mundësi në hidrogjenin e gjelbër dhe desalinizimin në Turqi, duke argumentuar se energjia e ripërtëritshme e kombinuar me magazinim dhe hidrogjen do të jetë thelbësore për dekarbonizimin afatgjatë.
“Kur ke energji të ripërtëritshme dhe një kosto shumë efikase të saj, atëherë duhet të mendosh për hidrogjenin e gjelbër”, tha ai, duke shtuar: “Hidrogjeni i gjelbër është energjia e së ardhmes”.
