Bullgaria ka hyrë në fazën përfundimtare të realizimit të projektit strategjik të Korridorit Vertikal të Gazit, me synimin që punimet kryesore të përfundojnë deri në fund të vitit 2026. Projekti konsiderohet me rëndësi të madhe për sigurinë dhe diversifikimin e furnizimeve me gaz në Evropën Juglindore dhe më gjerë.
Autoritetet bullgare kanë bërë të ditur se zgjerimi i kapaciteteve në pikat kyçe të lidhjeve ndërkufitare me Greqinë dhe Rumaninë do të përfundojë brenda këtij afati, duke rritur ndjeshëm mundësinë e transmetimit të gazit nga jugu drejt veriut të kontinentit, njofton Energy Monitor.
Korridori Vertikal i Gazit synon të mundësojë transportin e gazit natyror, përfshirë edhe gazin natyror të lëngshëm (LNG) që arrin në terminalet greke, drejt vendeve të Evropës Qendrore dhe Lindore, përfshirë edhe Ukrainën. Projekti pritet të rrisë fleksibilitetin e tregut, të përmirësojë qasjen në burime alternative furnizimi dhe të forcojë sigurinë energjetike rajonale.
Zgjerimi i infrastrukturës do të përfshijë rritjen e kapaciteteve të transmetimit në disa nyje strategjike, duke e pozicionuar Bullgarinë si një pikë kyçe tranziti në rrjetin evropian të gazit. Përmes këtij projekti, Bullgaria synon të kontribuojë në reduktimin e varësisë nga furnizimet tradicionale dhe në krijimin e një tregu më të integruar dhe më konkurrues të gazit në rajon, përcjell Energy Monitor.
