Prodhimi i energjisë elektrike nga burimet e ripërtëritshme në Maqedoninë e Veriut është rritur ndjeshëm në muajin shkurt, duke shënuar një rritje prej 89% krahasuar me të njëjtin muaj të vitit të kaluar.
Sipas të dhënave të publikuara nga Operatori i Tregut të Energjisë Elektrike (MEMO), prodhuesit e energjisë nga burimet e ripërtëritshme kanë gjeneruar rreth 93,600 MWh energji elektrike gjatë muajit shkurt.
Hidrocentralet vazhdojnë të mbeten burimi kryesor i energjisë së ripërtëritshme në vend. Prodhimi i tyre arriti në 61,359 MWh, duke përbërë pjesën më të madhe të energjisë së gjeneruar nga burimet e gjelbra, përcjell Energy Monitor.
Ndërkohë, dy parqet e erës në vend prodhuan rreth 29,600 MWh, ndërsa centralet fotovoltaike kontribuan me rreth 1,000 MWh energji elektrike. Kontribut më të vogël patën edhe centralet e biogazit dhe biomasës, të cilat prodhuan rreth 1,600 MWh.
Sipas të dhënave zyrtare, në Maqedoninë e Veriut operojnë 178 prodhues të energjisë nga burimet e ripërtëritshme, ndërsa kapaciteti i përgjithshëm i instaluar në këtë segment arrin rreth 178 MW.
Rritja e prodhimit të energjisë së ripërtëritshme vjen në një periudhë kur vendi po shton investimet në këtë sektor dhe po zgjeron kapacitetet e energjisë diellore dhe të erës, si pjesë e përpjekjeve për të ulur varësinë nga prodhimi i energjisë nga qymyri dhe për të përshpejtuar tranzicionin energjetik.
