Shqipëria po konsolidohet si një destinacion i besueshëm për investimet në energji të ripërtërishme, duke shfrytëzuar potencialin e energjisë diellore dhe të erës.
Në fjalën e tij në “Matchmaker Albania”, Ministri i Infrastrukturës dhe Energjitikës, deklaroi se sektori energjetik shqiptar ka hyrë në një fazë rritjeje të jashtëzakonshme, duke e kthyer vendin në një destinacion të besueshëm për investime të qëndrueshme.
Për ministrin, “ky zhvillim e pozicionon Shqipërinë si një aktor të qëndrueshëm në tregjet globale të energjisë dhe krijon mundësi të reja për investitorët në sektorin e energjisë së ripërtërishme.”
“Sot, mbi 500 megavat kapacitet vijnë nga energjia diellore, duke rritur pjesën e energjisë së gjelbër, duke reduktuar varësinë nga hidrocentralet dhe duke forcuar qëndrueshmërinë tonë.
Gjithashtu, po zgjerojmë horizontet e reja. Sot kemi projekte shumë të avancuara në Shqipëri për energjinë e erës, që janë ndër më të mëdhatë në Europë. Energjia fotovoltaike lundruese po përdoret gjithashtu, duke shfrytëzuar potencialin e baseneve tona ekzistuese.
Investimet në infrastrukturë dhe interkonjeksion po përmirësojnë lidhjen e sistemit dhe po mundësojnë integrim më të lartë të burimeve të rinovueshme. Në nivel rajonal, Shqipëria po rrit ndërlidhjen me fqinjët dhe po pozicionohet si një portë e besueshme për shkëmbimin e energjisë në Europën Juglindore. Me linja të forcuara transmetimi dhe një treg që po bashkohet me Italinë, Greqinë dhe rajonin, Shqipëria po luan një rol gjithnjë e më të rëndësishëm në integrimin e tregjeve europiane të energjisë”, tha ministri.
Në këtë kuadër, theksoi ministri, Shqipëria synon të zgjerojë ndjeshëm kapacitetet prodhuese dhe të kthehet në eksportues neto të energjisë deri në vitin 2030.
“Duke parë drejt të ardhmes, ambiciet tona janë të qarta, ne synojmë të zgjerojmë ndjeshëm bazën tonë të prodhimit dhe ta pozicionojmë Shqipërinë si një eksportues neto të energjisë deri në vitin 2030.
Por rritja jonë nuk mjafton me kaq. Ky është një udhëtim i përbashkët drejt modernizimit. Ne po përqafojmë inovacionin dhe teknologjinë më shumë se kurrë më parë. Dixhitalizimi i rrjeteve tona, infrastruktura e matjes inteligjente dhe automatizimi po transformojnë mënyrën se si energjia prodhohet, shpërndahet dhe konsumohet”, tha ministri.
Edicioni i dytë i platformës “Matchmaker Albania”, që bashkon investitorë, kompani dhe institucione, po zhvillohet me fokus në nxitjen e investimeve konkrete dhe forcimin e bashkëpunimit ekonomik.
/rtsh.al
