Qeveria e Maqedonisë së Veriut planifikon të investojë të paktën 50 milionë euro për përmirësimin e efiçencës së energjisë në ndërtesat publike, duke e vendosur këtë proces ndër prioritetet kryesore shtetërore.
Ministria e Energjisë, Minierave dhe Burimeve Minerale ka nisur përgatitjet për këtë cikël investimesh përmes një takimi koordinues, ku janë prezantuar udhëzimet për hartimin e studimit përgatitor për efiçencën e energjisë.
Si hap fillestar, është përpiluar një listë prej 14 ndërtesash publike prioritare, me një sipërfaqe totale prej rreth 100,000 metrash katrorë dhe me një vlerë të vlerësuar investimi prej rreth 11 milionë euro.
Ky projekt përbën bazën për krijimin e një portofoli më të gjerë investimesh, me synimin që në fazat e ardhshme të arrihet një vlerë totale prej të paktën 50 milionë euro.
Programi po zhvillohet në kuadër të iniciativës PEEB Cool, me mbështetjen e Agjencisë Franceze për Zhvillim (AFD), në bashkëpunim me GIZ dhe institucionet përkatëse.
Sipas kritereve të përcaktuara, çdo ndërtesë duhet të përmbushë të paktën dy nga tre objektivat kryesore: kursim energjie prej 40%, ulje të emetimeve të gazeve serrë me 40%, ose kursim të ujit me 40%. Për ndërtesat që nuk kanë sisteme ftohjeje, kërkohet gjithashtu përmirësim i komfortit termik me të paktën 20%.
Autoritetet kanë theksuar se vendi ka detyrim ligjor të rinovojë çdo vit të paktën 3% të ndërtesave publike gjatë periudhës 2025–2028, me synimin për të arritur një nivel prej të paktën 9% deri në vitin 2028.
Ky investim synon të ulë konsumin e energjisë, të përmirësojë kushtet në sektorin publik dhe të përshpejtojë tranzicionin energjetik të vendit në përputhje me standardet evropiane.
