Ministria e Energjetikës, Minierave dhe Burimeve Minerale e Maqedonisë së Veriut ka përfunduar studimin e parë gjithëpërfshirës për hidrogjenin, i hartuar me mbështetje teknike të Bashkimit Evropian.
Sipas ministres së Energjetikës, Sanja Bozhinovska, studimi analizon mundësitë për prodhimin, transportin, ruajtjen dhe përdorimin e hidrogjenit të gjelbër, duke konfirmuar se Maqedonia e Veriut ka potencial real për t’u bërë pjesë e infrastrukturës së ardhshme evropiane të hidrogjenit, përcjell Energy Monitor.
Me këtë dokument strategjik, Maqedonia e Veriut renditet ndër vendet e para në rajon që kanë një vizion kombëtar për zhvillimin e sektorit të hidrogjenit. Sipas ministrisë, studimi paraqet një hap të rëndësishëm drejt tranzicionit energjetik, dekarbonizimit të ekonomisë, tërheqjes së investimeve të reja dhe forcimit të sigurisë afatgjatë energjetike.
“Studimi konfirmon se Maqedonia e Veriut ka potencial real të bëhet pjesë aktive e infrastrukturës së ardhshme evropiane të hidrogjenit”, ka shkruar ministrja Bozhinovska në postimin në rrjete sociale.
Hidrogjeni i gjelbër konsiderohet një nga teknologjitë kyçe për dekarbonizimin e industrisë dhe sektorëve ku elektrifikimi është më i vështirë, ndërsa Bashkimi Evropian po investon në zhvillimin e një rrjeti të përbashkët për prodhimin dhe transportin e tij në të gjithë kontinentin.
