Elektroprivreda Republike Srpske (ERS) ka hapur tender për ndërtimin e parkut me erë Hrgud, me kapacitet të planifikuar prej 60 MW, në jug të Bosnjë e Hercegovinës.
Sipas Balkan Green Energy News, projekti parashikon instalimin e 10 turbinave me erë, me prodhim vjetor të vlerësuar në rreth 160 GWh. Investimi total vlerësohet në rreth 95.7 milionë euro, përfshirë parkun dhe infrastrukturën përcjellëse.
Tenderi kërkon nga ofertuesi jo vetëm ndërtimin e projektit, por edhe sigurimin e financimit për investimin, përcjell Energy Monitor.
Parku Hrgud do të ndërtohet në territorin e komunës së Berkoviqit, ndërsa projekti ka qenë në zhvillim prej vitesh. Në dhjetor 2025, ERS kishte nisur gjithashtu procedurat për vlerësimin paraprak të ndikimit në mjedis për projektin.
Me 60 MW kapacitet të ri, Hrgud do të shtojë një tjetër projekt të energjisë së erës në sektorin energjetik të Bosnjë e Hercegovinës, ku energjia hidrike dhe termocentralet me qymyr vazhdojnë të kenë peshë të madhe.
