Zëvendësdrejtoresha ekzekutive e KESCO-s, Rudina Heroi‑Puka, ka deklaruar se dhjetëra biznese në Kosovë kanë zgjedhur KESCO-n si furnizuesin e tyre të energjisë në tregun e lirë, ndërsa shumë të tjera janë në proces të negocimit të kontratave. Sipas saj, KESCO deri më tani ka lidhur rreth 100 kontrata me kompani që janë obliguar të kalojnë në treg të hapur për shkak të përmasave ekonomike të tyre.
Kalimi në tregun e hapur, i cili sipas rregullores së ZRrE-së përfshin bizneset me mbi 50 të punësuar ose me qarkullim mbi 10 milionë euro në vit, ka hyrë në fuqi me afat përfundimtar më 30 korrik 2025. Pas kësaj date, KEK – Furnizuesi i Mundësisë së Fundit – nuk do të ofrojë më energji për këtë kategori konsumatorësh, duke e lënë përgjegjësinë e furnizimit në duart e furnizuesve të licencuar.
Heroi‑Puka theksoi se KESCO nuk është fokusuar vetëm te sigurimi i klientëve të rinj, por ka ofruar informim dhe mbështetje për të gjitha bizneset e prekura nga liberalizimi, pavarësisht nëse do të nënshkruajnë kontratë me ta apo jo. Kompania ka ngritur qendrën “KESCO Premium”, një hapësirë e dedikuar për këshillim dhe ndihmë për të gjithë subjektet afariste që operojnë në treg të hapur.
Përveç mbështetjes logjistike dhe administrative, KESCO po ofron edhe platforma teknologjike dhe burime njerëzore për trajtimin e kërkesave, në përpjekje për të garantuar vazhdimësi të furnizimit pa ndërprerje pas afatit përfundimtar.
Kompania ka nënvizuar se pas datës 30 korrik, bizneset që nuk kanë përzgjedhur një furnizues do të përballen me rrezikun e ndërprerjes së energjisë, por do të kenë ende të drejtë të zgjedhin furnizuesin e tyre në tregun e hapur. KESCO rekomandon që kontratat të lidhen para kësaj date për të shmangur pasigurinë.
