Banka Evropiane për Rindërtim dhe Zhvillim (BERZH) do të ofrojë një paketë financimi prej 10 milionë eurosh për institucionin mikrofinanciar Alter Modus në Mal të Zi, me qëllim zgjerimin e qasjes në financa për ndërmarrjet mikro, të vogla dhe të mesme.
Paketa përbëhet nga tri kredi: 7 milionë euro për ndërmarrjet mikro, të vogla dhe të mesme, 2 milionë euro për bizneset e udhëhequra nga gratë dhe 1 milion euro për bizneset e udhëhequra nga të rinjtë.
Financimi do t’i mundësojë Alter Modusit të rrisë kreditimin për bizneset private në të gjithë Malin e Zi, përfshirë edhe ato jashtë kryeqytetit Podgoricë. Programet për gratë dhe të rinjtë synojnë përkatësisht ndërmarrjet e udhëhequra nga gratë dhe ato të drejtuara ose në pronësi të sipërmarrësve nën moshën 35-vjeçare.
Bashkimi Evropian do t’i mbështesë dy kreditë e dedikuara për gratë dhe të rinjtë përmes Fondit Evropian për Zhvillim të Qëndrueshëm Plus (EFSD+), duke ofruar garanci për mbulimin e humbjeve të para dhe asistencë teknike. Në këtë mbështetje marrin pjesë edhe Luksemburgu dhe Italia, përmes Iniciativës së Evropës Qendrore, përcjell Energy Monitor.
Së paku 20 për qind e kredisë prej 7 milionë eurosh për ndërmarrjet e vogla dhe të mesme pritet të përdoret për investime të gjelbra, përfshirë përmirësimin e efiçiencës së energjisë dhe shfrytëzimit të burimeve.
“Ndërmarrjet mikro, të vogla dhe të mesme janë shtytëse kryesore të ekonomisë së Malit të Zi, duke krijuar vende pune dhe duke mbështetur rritjen në të gjithë vendin”, tha Ekaterina Solovova, drejtuese e BERZH-it në Mal të Zi.
Ajo shtoi se paketa synon të përmirësojë qasjen në financim për bizneset që vazhdojnë të përballen me pengesa në sigurimin e mjeteve, veçanërisht ato të udhëhequra nga gratë dhe të rinjtë.
Sipas BERZH-it, banka ka investuar deri më tani 1.1 miliard euro në Mal të Zi, përmes 116 projekteve që mbështesin zhvillimin e qëndrueshëm, infrastrukturën, sektorin privat dhe integrimin rajonal.
